8m1w
剛過去星期六係重陽節, 時間過得好快, 媽媽都差不多過左身一年, 快到我自己都唔敢相信, 好似只係幾個月前既事, 但原來就快一年! (過去呢一年真係好感恩有神既看顧帶領)
平時無乜野既時候就好地地, 但一諗起媽媽, 一踏入寶福山, 所有零零碎碎既片段又即時湧上心頭. 雖然已知係事實, 但個心仍然會痛, 經常諗起最後見媽媽時既情境!
第一次帶承熹去探"婆婆". 有人話BB既認知能力其實好強, 你唔好以為佢乜都唔識唔明, 但其實佢地係知發生緊咩事, 只係唔識表達! 有時候, 我都幾讚同呢個講法 (尤其BB係識得睇人黎蝦呢個手法, 我絕對相信)
當日去到寶福山, 承熹全程都無笑容, 但又無扭計, 感覺係佢好似知道呢個地方係要莊嚴啲, 唔可以大吵大鬧. 去到婆婆面前, 承熹都好乖 (個到其實好多煙, 我自己都覺得好澀眼, 我都怕承熹會唔舒服會扭計) 但好感恩, 佢又完全無野, 直到我地坐lift走既時候, 佢就開始有返笑容.
如果婆婆真係係天上見到承熹, 佢一定好安慰, 好開心.. 因為婆婆曾經都有倍過我去照超聲波, 都有見過承熹啲3D相. 婆婆係有同過承熹接觸過的.
去完探婆婆, 我地去沙田新城市廣場行一陣, 承熹成個下晝都無訓, 坐車仔一陣就訓著, 仲要訓到大爺咁!
其實攞住架車仔出街(尤其我呢部), 都好重好唔方便! 但無辦法, 承熹越黎越重, 佢又需要nap nap, 我實在無辦法唔帶車仔出去. 試過帶架'士的車'(舊款朋友轉贈的), 但個款係無得放平訓, 承熹完全訓唔到, 所以都係留返大個啲先啱用! 各位媽媽, 你地有冇更好既建議分享, 你地平時出街多唔多帶BB車??
之前團購係Yume做左條字母頸鏈, 手功好好, 所以我又訂做一條手鏈, 係用承熹個英文名, 尋日到手, 好靚, 我好鐘意! (如果有朋友都想訂, 我有VIP咭八五折, 有興趣可以問我攞No. )
***********************************************************************************
最近我去睇中醫調理身體, 因為生完承熹後失控地大汗(之前係淡汗, 依家好啲, 變返咸汗), 醫師話係荷爾蒙失調, 又呢到虛, 個到弱 (我諗睇中醫十個有十個都係咁講, 從來無聽過啲人話中醫會讚你身體好好)
到依家為止食左大約三星期既藥, 大汗方面未有改善, 但腰骨明顯比之前好左好多, 無咁冤痛, 同埋夠氣左, 依家孭住承熹行樓梯都無喘氣! 以前既我從來都唔睇中醫, 更加唔信戒口呢啲野, 但年紀大左, 都無得唔屈服, 加上我都想調理好個身體準備生下一胎, 哈!
如果天氣OK, 我會孭埋承熹一齊去睇中醫, 順便同佢行下街, 唔好成日屈係屋企!
依家出去食飯, 承熹好多時都想起身, 唔願坐係車仔到... 所以我必需練成一身好武功, 一邊食一邊欄住佢, 三爬兩啖唔在講, 仲要成日同佢玩眼明手快顯神通, 否則好易攪到一身都係食物!
做媽媽真係好偉大架!! 嗚~~~~~
仔始終係仔, 坐都坐得豪邁過人!
承熹呢排好似識得叫"媽媽", 每逢唔高興扭計既時候就會不停"媽媽媽媽" (但佢又唔係望住我叫!)
我唔知佢真係叫我, 定學大少奶話齋, 佢"忟"到媽媽聲? 哈哈~
但無論點我都覺得好開心, 因為聽到"媽媽"呢兩個字出自承熹把口, 我覺得叫得好好聽, 好實在! (又係到發仔瘟!)
前幾日開始承熹又食少左奶, 每餐奶都會食剩一兩安, 同埋好似有少少忟憎, 我估...... 佢上面兩隻牙應該係不久既將來要-----------爆啦!
希望呢段時間快啲過去, 捱過呢關佢又會食得好, 訓得好.. 將承熹交托俾主!
(感恩感恩)
