2010年9月30日 星期四

七個月大


承熹依家7m2w, 時間又係過得好快, 眨下眼就八個月


雖然我懶寫blog, 但都想堅持每個月至少要寫一篇關於承熹生長進度既網誌


一來係俾自己將來睇返作回憶, 二來可以俾一啲新手媽媽作參考! (因為我自己都好鐘意睇人地寫自己BB既生長過程, 我可以從中偷師或更加了解BB每個階段大約既成展進度或飲食方面應該如何處理)


上個月六個月大時, 承熹去左台灣! 係台灣佢作出人生第一次既反身


今次七個月大去左上海!! 係上海佢都有新既常試, 就係自己揸住個奶樽飲晒成支奶!


呢個動作真係第一次, 之前都試過將佢隻手放係奶樽到, 睇下佢可唔可以自己有意識咁攞住, 但好多時唔夠一陣佢隻手亂fing就fing 甩左, 你係睇得出佢唔知自己做緊乜?!


但到依家為止, 佢每餐大部份時間都會自己攞住食, 你睇到好大分別既係佢知自己係攞住枝奶, 就算佢個頭兩面望, 佢對手仍然會緊握住枝奶, 唔俾佢跌.. 不過往往飲到尾聲, 佢開始飽飽既時候, 就會放手, 呢個時候我就要出手迫佢食埋佢!


 


另一大突破既係, 承熹依家會自己扶住sofa邊或者床仔既圍欄自己企係到, 呢個行為令到我同大少好頭痛, 因為佢識得反身, 識自己坐係到, 依家仲企埋係到, 真係睇少眼都唔得!  我地即時將床仔較到最底個格, 費事佢跌落地! 


加上佢依家開始識爬, 放佢係playmat又要睇實佢, 佢唔會再定定係到玩, 而係見到乜野想攞就會爬過去, 動作快到驚人!!!!


以前佢唔識反身就好想佢可以快啲反, 當佢識反身後其他動作就陸陸續續不斷咁增加! 我有時真係想佢去返成舊飯, 乜都唔識既時候, 只係食同訓, 易湊好多!!!


係飲食方面, 承熹自六個起就食糊仔(用奶開) - 純米糊, 水果味米糊, 香蕉米糊, 南瓜米糊等都係呢啲簡單配搭.  佢初初頭三日都唔肯食, 一遞隻羹去佢口邊就喊.. 但食到第四/五日就有改善, 開始肯主動開口.  由初初食四五匙開始到大半碗慢慢增加..食完再食四至五安奶


但去完上海返黎後, 我又轉煲粥仔佢食..  啲配搭主要都係用蔬菜, 每款蔬菜食三日, 睇下佢有冇不適, 再轉其他款!  我初初煲粥就用煲煮, 但後尾覺得唔夠綿, 就用返飯煲煮, 反而又簡單又夠綿 (多謝BB Yee教路)


初時我怕粥仔太粗(比起糊仔粗粒), 所以我會將粥仔&菜一齊blend完先俾承熹食, 但食左一個禮拜到有朋友話夠綿既粥就唔洗再blend, 因為啲粥blend完會有好多風, BB肚仔有風會扭計, 所以一個禮拜後我就無再blend粥, 只blend菜... (菜都係: 菠菜, 南瓜, 西蘭花, 紅蘿蔔或者蛋黃), 有時懶或者趕唔切煲粥, 我又會俾返香蕉糊仔佢食


一款菜食兩日(一次過整好放係密實盒), 每次食既時候撈落啲熱粥到, 咁就啱啱好唔太熱可以餵!  今日起我就試加魚俾佢撈係粥仔食.



承熹依家可以食比呢碗更大碗既粥


 


承熹由初初唔肯好接受粥仔(我發現小朋友有一個特質, 係唔鐘意試新野, 所以媽媽們初初唔洗太勞氣, 其實我講緊自己! 哈~) 到第三日佢又好肯食, 由初初半碗加四/五安奶到依家佢可以食到一大碗小山丘既份量, 但食晒後就飲唔落奶, 就俾少少水佢飲!


呢啲都係承熹係七個月發生既改變... 我工人成日話佢應該十個月大會識行, 我好頭痛! 諗緊好唔好買學行車? 但好多人話學行車會令到佢對腳唔好, 但大少又話, 以前個個都係坐學行車大架啦, 又唔見我地對腳有問題??


我都唔知, 大家有冇意見分享下呢?



我又用iphone 啲apps攞個仔黎玩, 我一邊玩一邊笑, 真係好好笑! 原來承熹個樣可以襯到好多唔同造型..wakkakakakaa


2010年9月28日 星期二

結婚一週年紀念

今日, 係我同大少結婚一週年


真係眨下眼話咁快就一年, 究竟係我做左人阿媽, 睇住細路快速成長, 所以感覺真係快到有啲驚?! 抑或好似有啲人既講, 年紀越大就會感覺時間過得越快?


我結婚時啱啱搬入我依家住緊呢到, 一年啦.. 我感覺好似都係啱啱搬入黎無幾耐!


尋日我地book左去洲際食晚飯, 因為上年結婚係到擺酒, 佢送左一張$1000現金券俾我地, 一年內要用. 一直都係諗住留返一週年先用, 但expiry date係28/9/2010, 所以尋日就提早一日慶祝!



可以選擇係佢地酒店內任何一間餐廳, 我揀選左 The Steak House Winebar + Grill


一早訂枱時已經request window seat, 原本尋日心血來潮想帶埋承熹去, 打電話問有冇highchair後, 佢話window seat放唔落highchair, 如果帶BB來就要轉返入面少少既座位! 最後, 我呢個無良媽媽揀左window seat, 放棄左個仔! 哈!!!!!



際洲個view真係無敵! 同一個地方, 同一個角度, 只係時間唔同左... 但我仍然好記得上年同大少係酒店房內一齊欣賞激光匯演, 個份甜蜜仍然在心頭~



之前睇過一本雜誌講及牛油既種類, 原來都好講究! 平頭既牛油係代表有鹽份, 尖頭既牛油就係unsalted...  


佢地呢到既三款牛油, 第一款剩黃色係原味牛油/第二款係蕃茄味/第三款係黑松露菌味


三款都好味, 剩係食包都食到唔想停口!



店內其實好暗好暗, 但佢地既menu竟然係有燈!  大少好鐘意呢個設計, 因為佢平時鐘意臨訓前睇書, 佢話如果啲書都有呢種功能就好..哈!!




隨麵包後, 侍應遞上一盤不同國藉既鹽, 係用黎食頭盤&主菜.. 不過啲野食都好夠味, 無乜點用過~



龍蝦湯 - 都幾大碗!  但賣相唔掂



旁邊有一條紫菜條, 條紫菜好好味! 個湯都唔錯, 不過老實講, Tubino好飲啲... 價錢當然都相宜好多!



頭盤我地叫左個海鮮拼盤 for 2, 黎到既時候就知'乃野', 因為我本身唔算肚餓, 所以諗住唔叫main course, 只食appetizer, 大少又話想食呢個, 所以就叫二人份! 侍應同我地講左都幾大份, 我地諗住海鮮應該飽極有限, 點知原來真係咁多!!!!!



大少飲完個湯已經話有少少濟, 佢仲叫左份Steak, 所以最後佢食到一半就放棄話唔食, 留肚食steak!!!! 我唔想浪費兼阻又好好味, 唯有自己啃晒佢啦... 哈, 我估唔到我竟然可以差不多KO晒佢地!



長腳蟹, 超鮮甜!!! 我不嬲唔鐘情食蟹, 皆因我唔識食, 唔識點拆肉, 但已經剪好晒殼既我就會好樂意~



鮑魚仔, 好爽口彈牙! 雖然全部都係就咁凍食, 無汁料伴住, 但就咁食佢地本身既鮮味都已經好正~



龍蝦好多膏, 肉質都好唔錯!



唔知咩蟹, 佢全部有三款蟹, 但我最鐘意食都係長腳蟹, 因為夠juicy...其他都ok!



好似我塊面咁長既大蝦,, 又係個頭超多膏, 我最鐘意食膏... 好好味!!!



小龍蝦就麻麻地... 啲肉無乜味!


其他仲有帶子, 翡翠螺, 青口 & 普通蝦, 全部都係好味的~



完成左我一個人食左好耐先食完既頭盤, 侍應又攞一排刀出黎介紹唔同國藉既刀, 由左至右, 越右邊越重身.. 俾客人隨意選擇想用邊種刀去享用牛排!


我地揀完後, 我問大少點解要咁呢?? 用唔同刀去食牛排件排會好味啲????


大少答我: 呢啲咪叫"無個樣整個樣囉"!!!!! (笑死我, 可能我地見識少, 真係唔明!)



呢份係Today Special, 叫做 '12安士封乾左十四日既F1日本和牛', 其實我唔明咩叫封乾左十四日, 封乾左又如何? 點解要咁貴???


大家都好飽, 所以覺得對呢個Steak有啲唔公平, 因為係飽既狀態下食野, 一定會減少少分數, 但無辦法, 鬼叫order錯野咩!



轉個頭個侍應又黎俾十幾兜mustard我地揀, 佢一輪咀介紹完我都唔記得邊款打邊款!



個扒既味道唔差, 但是.................................. 我地覺得都係正常既和牛好味好多, 而且唔值咁貴囉!!!!!!!!!!!!


最後我地用左一千蚊既coupon, 仲要倒貼二千幾埋單, 呢間餐應抵唔抵食真係見人見智!!!!!!!!


撇除餐飯既價錢, 我地當晚食得都好開心, 因為個view好靚, 情調都唔錯.... 好耐無同老公兩個單獨出去食飯食咁耐(由七點食到十點幾), 其間不停有講有笑, 感覺好似去返以前初初拍拖時既感覺, 好開心 ~


其實今日先係正日...


今晚, 我都係會自己落廚煮返啲啱大少口味既晚飯, 同埋承熹一齊過!!!!


2010年9月26日 星期日

上海世博精華遊 Day 2 Part II

續上... (要快啲追返, 否則開始無記性!)


等到契媽放公我地就入世博會...


係上海千萬唔好下午五六點坐的士, 因為實在塞車塞到暈左, 同埋記得要坐世博專用的士先可以入到世博入口, 否則係好遠就要落車行入去.  另外就係如果可以, 最好係香港或者其他地方買定入場票先, 因為佢地既售票處唔近入口, 去到先買就有啲麻煩!


我地當日因為book左餐廳食晚飯, 所以就要係三號(D-F)入口入



入世博既裝備越簡便越好! 水唔洗帶, 因為入面有得買同埋有好多水機provide, 唔洗驚無水飲.


因為入場會check得好嚴, 所有食物, 飲品都會問長問短! 好似承熹沖奶既水, 佢都要問用黎做乜, 要我地飲一啖俾佢睇; 仲有承熹用既凡事林 (擦屁股), 佢都要我地擦俾佢睇! 甚至連唇膏/香水, 都要你即時擦/噴, 驚死你帶啲違禁品入去!


當晚book左法國餐館六點半, 但最後大約八點先到! (因為買入場票延遲, 入場檢查延遲, 行好遠又延遲, 又要坐shuttle bus先到... )



沿途風景... 其實世博入面真係幾靚!



餐廳位於DEF區, 比較靜, 無主題館, 只有案例館! 咩叫案例館, 即係介紹下貴國既歷史同背景之類... (其實我地都唔明咩叫案例館, 有啲咩案例呢? 最後問工作人員先知)





係網上見到有人話呢間餐廳好食, 諗住黎上海應該日日都會食上海菜, 所以揀左呢晚試下正宗法國菜! (一定要訂位, 否則要等到好晏先有, 我地不停打去改時間改時間先hold到位)


地方唔算大, 但廚師及侍應大部份都係法國人(或者應該係話, 全部都係外國人.. )



Welcom drink! 西瓜汁..



頭盤: 鵝肝乜乜乜..唔記得!



我同大少的牛柳, 個汁好好食



爸爸的海鮮拼盤 (老豆夜晚返酒店後要去附近搵野食, 因為唔夠飽...哈!)



契媽的鱈魚, 都好正!



甜品(免費的)


其實呢餐飯都唔錯, 食物味道同質素都好好, 只係我地太攰&食得好趕.. (之前嘥左太多時間), 所以食得好急, 跟住就埋單走人!


食完都成九點幾, 其實都知睇唔到咩, 只係周圍行下, 當視察環境 (因為會再黎多晚)



周圍都有啲擺設, 雖然無乜意思, 但都叫有啲野睇下



係呢邊要坐返船過A-C區, 個到先係主場! 碼頭近住中國航空館, 事後先知都好似幾多野睇, 我地又miss左!


座船都好舒服, 天氣唔熱, 好涼爽, 仲可以睇埋兩邊建築物既景色, 仲有南蒲大橋, 幾靚!




今次去上海特登買左部新相機 - Panasonic LX5, 超好用, 特大光圈, 影夜景一流! (完全無用腳架)



遠望第一眼就見到中國館同埋世博文化中心, 好靚!



好多館九點半/十點就關閉, 雖然世博正式係收半夜十二點, 但去夜場的話, 時間都幾緊迫, 建議如果只係去夜場, 最好食左野先入去, 唔好嘥時間係入面食!



好想入去既沙特阿拉伯館, 但入唔到!!!!!! 好多書都話阿聯酋館係必去之一



無得入館唯有周圍影 - 台灣館



中國館, 無一早攞預約票更加唔洗旨意入去!



承熹係世博訓左幾轉, 對佢黎講實在太悶, haaaa




有條世博軸, 貫穿好多館, 唔想同人迫都可以行呢條軸去欣賞其他館既外貌, 呢到有長椅可以坐下休息, 有洗手間, 有小食亭, 仲有紀念品賣! 


其實世博雖然超多人, 但佢地勝在地方夠大, 行起上黎唔算好迫好迫, 而且清潔方面都唔太差 (比起深圳黎講)


我地大約行到十一點就返屋企, 係到坐的士都幾多人, 可能要等十五至二十分鐘先有車, 都可以接受既, 比我想像中好好多, 起碼係有秩序, 唔係死掙!



夜晚返到去, 承熹鬼打咁精神, 洗白白之前除晒衫同契媽影張相先! 好彩沖完涼食完奶都肯即刻訓~


聽日再戰世博!