2010年5月31日 星期一

百日宴


五月廿一日星期五係承熹擺'百日宴'既大日子! 自承熹出世後, 我一直都好期待百日宴既來臨, 因為成日都聽人講, BB一到三個月大就會開始好易湊, 哈~ (現況, 托賴啦, 比起頭兩個月真係好湊左好多!!)


偏愛簡單結婚儀式既我地, 結婚時只係簡簡單單自己人食飯.  為滿足奶奶既意願, 所以今次承熹擺'百日宴'就請返多d人, 加埋都有十圍, 所以我都揼少少本做左個backdrop, 希望大家影相可以靚d.



希望承熹將來睇返d相都感受到大家對佢既寵愛~



承熹, 你是媽咪的心肝寶貝!



時間尚早, 趁客人未黎, 叉一叉電先!


(Copy from Vanlily)
當日仲好榮幸, 有餅神Vanlily為承熹做既"BB系列"糖霜曲奇做回禮禮物, 真係好靚, 每位客人都大讚, 好多人都想儲齊一套, 哈! Sorry, 每人只預一件, 只有我地承熹先可以儲齊咋!! hahahha



承熹既契爺契媽, 佢地係我由細識到大既best friend, 承熹好幸福, 契爺同契媽都超錫佢!



媽媽的好友們...



成日都食手指, 仲要打孖黎食!



俾奶你食啦, 唔好成日食手指!!!




訓醒左, 食飽左, 精神晒!



承熹當日真係好抵讚 (感恩), 佢全程都無扭過計, 邊個抱都OK (但其實佢已經開始識認人, 有時女麻女麻黎探佢, 佢見到都會喊)!  可能平時我地唔會成日抱佢, 所以個日有咁多人不停抱佢, 佢都不知幾happy, 仲點會扭呢!


但最抵錫既係, 開始入席食野時. 佢無扭計, 自己係車仔到玩玩下就訓著左, 我同大少可以好舒服咁食食食.. 一到差唔多敬酒時, 佢又無啦啦自己醒, 叉左一陣電, 又可以好乖咁去同人敬酒.. 哈哈! 敬完酒, 返埋位放低佢, 佢又自己訓著, 我地又可以繼續食食食... wahahaha....



招呼唔到...



仲要俾大伯父隊酒,...wakkakakak




無奈既承熹! 媽咪錫返囉~



全家福 (攝影師Cody, 睇住我大肚, 結婚 & 生仔)



臨尾送客時, 承熹真係撐唔住啦, 送到一半對眼已經跌落黎, 仲要係咁俾人笑 (個個見到佢釣魚都覺得好攪笑), 陰功, 人地咁攰仲笑人!!!



承熹, 多謝你今晚咁合作, 無失禮人啊! 個個都讚你好乖呢~



乖仔, 希望你以後都健康快樂, 做個樂天活潑既小孩子!


2010年5月25日 星期二

Tempo 盒裝面紙

公開網誌


 


Tempo一向既品質都好好, 所以一路以來我都堅持只會買Tempo包裝紙巾用 (因為唔想抹到塊面痴到一撻撻咁失禮,, hehehe )


以前我一直都諗, 點解Tempo只出包裝紙巾而唔出卷裝或盒裝面紙, 以佢既口碑應該唔怕無人買.


點知到佢真係出左盒裝後, 我發現佢既價錢比起市面上其他品牌既面紙都貴幾多! 廿幾蚊得三盒, 所以我又卻步無買到黎試, 直至承熹出世後無幾耐, 我先買左一pack試下.   


因為好多時幫承熹抹'seafood'時, 用其他品牌個d 紙巾好易濕到水就穿, 而且質地比較'鞋'身. 見到BB既皮膚咁幼嫩, 我又點捨得佢日日被粗糙既紙巾一日抹五六七次!


試過一次後即刻愛上!


Tempo果然係Tempo, 佢既紙質厚身好多, 而且好柔軟.. 以前用其他品牌既紙巾, 好多時抹seafood都要用多幾張先抹得晒, 抹得乾淨 (因為好易濕水就爛), 但係依家用Tempo就好好多, 至少抹poopoo, 都唔會一抹就過底, 攪到一手都係, 反而仲唔洗用咁多張紙巾黎抹添!


不過點解我會突登出一篇網誌黎讚一讚Tempo?! 原因係.........


今朝幫承熹洗衫時, 原來唔小心將一張Tempo紙巾都撈埋d衫一齊放入洗衣機, 當洗完後同大少一齊掠衫時, 我見到一條似毛巾但又好薄, 薄到有少少透既物體! 我同大少都驚嘆究竟呢條係毛巾定紙巾?! 好明顯, 佢係一張被洗過既紙巾, 但奇就奇在佢竟然無穿無爛, 好完整咁成張紙巾係返到, 只係濕左!


大少同我摸左幾次, 都覺得Tempo真係好掂啊! 果然係紙巾中既名牌啊, 所以我係到極力推介俾各位, 真係物有所值!


提外話 : 我發現吉之島/Apita既價錢比較貴, 要廿四個幾三盒, 但惠康好多時就十九個幾三盒, 藥房我就唔知, 因為我屋企付近既藥房都係偏貴, 所以無係個到買, 大家可以以十九個幾呢個價錢作參考!


2010年5月17日 星期一

好抵打

今個月二十日承熹就100日大啦!


呢隻小魔怪真係越黎越抵打, 之前仲好乖咁肯自己訓, 食6oz奶, 次次唔洗十分鐘就飲晒, 單單o個個禮拜就即時重左, 大脾都粗埋.


但好景不常, 呢幾日佢又玩對抗, 突然間唔肯飲奶, 頭個幾十ml都好似OK, 但好快就兩頭擰, 跟住就死都唔肯飲..  無論人奶或奶粉都唔濟(以前飲人奶會受落d), 每次一停左後再將佢打橫抱, 想墊條紗巾落下巴已經喊到拆天, 好似攞佢條命咁, 唔知想點?


飲奶飲得唔好, 相對訓覺又訓得唔好, 呢個係一個惡性循環, 真係唔知點好? 但佢又唔係唔舒服, 因為一唔迫佢飲奶, 打直抱起佢, 佢就同你笑, 死唔死! 唉, 最緊要佢唔係唔舒服, 可能係傳說中既厭奶期掛?!, 我地迫一兩次唔肯食就由佢, 希望過多一小陣就會回復正常啦!


我覺得湊小朋友真係好考耐性, 阿b今日正常唔代表以後都會正常, 因為bb一日一日咁大, 日日都會轉變, 吸收唔同既新事物, 佢會改變係理所當然; 做人父母, 最大問題唔係有冇四百萬去養bb, 而係有冇咁既耐性去照顧, 去教導一個小朋友.


我由細到大都無乜耐性, 三分鐘熱度, 仲有少少狂燥添..哈哈哈!  依家有左承熹, 家人都話 --- 哈, 依家有人你收你啦~ 


無錯, 神賜呢份禮物俾我, 令我感受到我除左要盡力教好承熹如何做人之餘, 同時我亦學習緊點去做一個人!


所以話: 做人父母甚艱難, 但都感恩神一直帶領!





承熹依家越黎越多野講, 仲越講越大聲, 第一次聽到佢笑得咁多聲卡卡聲, 好好笑!


 


2010年5月9日 星期日

母親節快樂


願各位母親 '母親節快樂' !


今年既母親節對我黎講感覺好難形容.


第一年母親節自己有份被祝福, 承熹只係一個baby, 當然唔知發生咩事?! 所以我地亦無特別點樣慶祝, 只係老公今日抱住承熹代承熹同我講左好多次'母親節快樂'! (但係我心中, 只要一家人健健康康, 齊齊整整咁一齊已經足夠)


作為母親, 見到自己既寶貝可以好健康正常咁成長, 唔洗等母親節, 我日日都好快樂, 亦都好感恩~


反而, 今年既母親節對我黎講, 我唔係真係好開心 (應該係話開心唔落) , 今年開始既母親節我無辦法再同我媽媽講一聲 '母親節快樂', 無辦法再為佢慶祝.  我只可以祈禱求神代我同媽媽講, 亦都希望媽媽現在處於天家, 將來可以團聚!


做左人媽媽, 明白到做媽媽既辛酸, 更加勾起我對媽媽既思念, 雖然表面上我已經接受左媽媽離開呢個事實, 但老實講... 當夜欄人靜時, 或食某樣野, 去某個地方, 都會令我想起同媽媽曾經一齊生活既點滴! 


其實, 我仍然好掛念媽媽, 每次想到佢都會覺得好難過!


我相信以後每年既母親節對我黎講都會係一個遺憾, 但我都要向神感恩, 因為呢件事既發生, 我真正學到咩叫'珍惜'.   錯過一次我唔想俾自己再錯, 唔想自己再後悔. 我會將對媽媽既愛廷伸到身邊既家人, 要好好對待佢地, 愛錫佢地!


大少曾經講過 : 初為人父, 發覺初生嬰兒同年紀老邁既人一樣, 極需要親人嘅照顧....父母會理所當然去照顧bb, 付出所有.  但bb長大後又會唔會諗照顧父母都係理所當然呢?!


我控制唔到仔女將來一定要照顧我地, 但我體會到做人父母對自己仔女個種'括'出去既愛, 我就一定要盡力盡心去照顧父母.


p.s. 今朝無意間睇到呢個blog - 陪著你走 http://hk.myblog.yahoo.com/carmen-anthony/article?mid=1, 又一令人感到'幸福唔係必然',每當人人都覺得垂手可得既野, 但原來係世界上某些人身上係變成奢望! 希望大家有時間可以去睇一睇, 如果可以, 更加麻煩大家為佢地一家禱告, 願神聽到我地既祈求!  多謝大家~


 (各位弟兄姊妹, 如果可以, 麻煩再forward 呢件事出去請更多人為佢地一家祈禱!)


2010年5月7日 星期五

感覺良好

Yeah~


原來一直都有咁多朋友會睇我個blog, 我以為我無寫一排, 又無再入廚, 已經無乜人會再睇我個blog, 依家知道原來仲有咁多人支持我, 寫blog個團火又返來啦!


私友化後 --- 感覺良好 (請用國語腔讀) heheee


希望大家以後可以繼續用心互相交流, 互相慰問, 互相支持!!!


*************************************************************************



承熹仲有一個禮拜就三個月大, 見到佢依家越黎越多反應, 真係好開心!


以前既我都會鐘情於得意可愛既BB, 但自從自己做左人阿媽之後, 真係深深感受到一個小生命既誔生及成長過程係幾咁充滿感恩&奇妙!


BB由懷胎十月至出生後既變化, 作為親生父母先會有最深既感受, 父母對自己仔女個種懷關及愛真係父母自己最清楚, 點滴在心頭, 所以依家既我唔會再話人地個BB唔得意, 唔靚仔/女. 因為每個小baby都係父母既心肝頂, 更係神賜俾人最寶貴既禮物, 係無價寶呢! (同埋bb天真無邪既反應, 表情已經係最可愛, 最得人鐘意)


承熹依家一日食五餐 : 0600/1000/1400/1800/2200


依家體重大約15lbs, 身長大約60cm, 最近開始食6安奶 (每日有一至兩餐人奶)


每日食完奶, 同佢掃風&玩一陣 或者放佢自己係籃到睇公仔自己玩到佢有少少忟憎, 就放佢落床仔等佢自己預備入睡! 偶然會喊兩聲, 但幾分鐘後就會訓著, 最尾二個餐奶食完就盡量唔俾佢訓咁多, 同佢玩多D, 等佢攰D, 跟住食完最後餐奶就可以訓天光!


跟據'由零開始'呢本書&一位Blogger既分享(http://hk.myblog.yahoo.com/jw!fdizju6LFRkWPn42N5sAmK7RURMs/article?mid=25), 我地總算好成功咁幫承熹戒甩左奶咀及養成可以乖乖自己係床訓覺而唔會大吵大鬧!  我同大少真係好感恩, 簡直係重生咁濟, kakkakaaa..... ~


事緣之前我地都開始幫佢戒抱住暗訓覺, 成績一時時啦, 時得時唔得, 原因就係我地未夠堅持 (有時費事佢喊到好嘈, 就抱佢訓), 同埋我地無戒奶咀, 佢好多時含住奶咀訓著後, 鬆左口令奶咀跌出黎, 佢就會醒, 然後大喊! 雖然佢都可以訓到六七個鐘, 但好多時要幫佢執奶咀, 又心驚膽吊怕佢會醒左好難訓返, 而且佢成日扭到好夜先訓, 第二日又好晏先起身, 唔得健康!


我地兩公婆亦為教仔而有分歧, 有拗撬! 佢覺得要戒奶咀先, 我覺得要戒抱住訓先, 大家意見唔得一致, 攪到大家都好唔高興, 見到阿仔係咁喊, 都唔知抱佢好定俾奶咀好?!  為此我都有祈禱, 希望神會教導我地如何是好?!


就係某個清晨餵完承熹食奶, 我誤打誤撞就睇到呢個Blogger既網誌, 佢教女既說法同'由零開始'係一樣, 而且佢仲會好清楚咁講實例, 令我地對呢本書既信心重燃, 同老公相量後就決定再試一次, 真係要好狠心, 要好堅持, 要兩公婆同心合力去面對!


哈, 就係咁, 得左!  當然頭兩日係最痛苦, 見到阿仔喊到聲都沙埋都唔可以心軟, 佢仲喊到抓損自己塊面, 不過我今次真係好堅持, 原因係我確信我所睇到既分享係神安排的. 係神藉著呢個blogger去教我地點做好! 所以, 就算有好多次見到阿仔喊到癲左想抱起佢時, 我都祈禱, 同埋同自己講, 我要信神, 我要退後一步交托俾神去教導.



破相樣! 頭兩日喊到癲左我地都唔抱佢, 又唔俾佢見到我地, 我只係遠望佢, 原來佢喊到抓損自己, 真可憐!


真係好感恩, 神係無跣我地, 佢愛承熹比我愛佢更多, 承熹依家習慣左自己係床仔玩一陣就訓, 不單止比以前訓好左, 連食都食得好左! 真係好令我同大少感到安慰~


經過呢次既體驗, 我對神既信心又增加左!  除左令我地學懂做人父母真係要好好好好好有耐性去教小朋友外(發現有問題要即時糾正, 幾艱辛都要, 否則只會害左佢同自己), 我亦深信有好多事只要對神有信心, 相信神為我地所作既會係最好既安排, 咁萬事都唔洗怕~


讚美主!!!!!!!!!


講左咁多, 俾大家睇下承熹既近照啦~



Janet Bin 個樣 (精甩邊~)



承熹依家一起身就會對住人笑, 真係好鬼冧! 越大越覺得呢個仔好得人鐘意.. hehhehheee



成日訓覺都傻笑, 我同大少試過大家坐係佢床邊望左成個下晝, 哈!



承熹好似好鐘意扒係到玩咁, 鐘意周圍望, 但我見佢抬頭抬咁耐, 好戥佢攰!



依家訓得好左, 唔洗用野包住都可以訓得好林!


 


 


表情多多, 第一張個樣好似係到扮可憐, 好抵死!!


2010年5月6日 星期四

忍無可忍

我實在忍無可忍!!!!


從四年前開始寫Y!BLOG, 越寫越上癮, 當年真係BLOG不離身, 由朝到晚都會捕住個BLOG.  因為除可以同家人朋友分享自己既生活逸事外, 仲識到好多來自唔同地方既朋友, 大部份都係有心人, 大家都係用真心去寫BLOG, 去回應.


但大約近呢一年半, 我唔知做乜事個YBLOG淪落到咁?!


由起初勁多無謂廣告留言外, 依家仲更加不知所謂.... 什麼推推, 灌灌水, 天氣好等呢d無heart 留言, 我唔明佢地留黎做乜?  如果係賣廣告都有得解釋, 但個d無謂既留言, 究竟對留言者有乜好處呢?


既然Y!BLOG都阻止唔到呢d 無謂人, 令到我越寫越無癮, 但又唔想完全摺埋, 我唯有將我個blog私有化, 只會俾"我的blog友" 睇到我出既網誌!


以前已經係blog友既朋友只要login就可以睇到我既野, 可能有d人都睇左一排, 只係我未加佢入blog友, 麻煩你地提一提我add返你地~


私有化後可以放心 & 開心地分享更多自己既事, 唔想再被無謂人騷擾!


 


BTW, 我已將小魔怪既生活日記及以前部份我同大少既網誌set返做私人, 唔想再被d無謂人污染我地美好既回憶! 哼!