2010年9月21日 星期二

驚喜午餐@Tubino


好耐都無好似以前咁特登去搵好野食, 記得以前每次係杜拜返黎, 都會約朋友週圍去搵好野食! 但自從返左黎香港咁耐, 加上生埋承熹後, 就真係少之有少, 約朋友食飯最緊要係就腳, 方便我帶埋承熹麻 .


之前見到有位朋友陳小姐介紹銅鑼灣駱克駅有一間高質素既意大利餐廳 -- Tubino, 佢話佢地既價錢唔算貴, 但啲食材全部都好新鮮, 好正宗.  講到咁正, 又咁就腳, 我當然要約埋親愛既家姐(大少奶)一齊去踩場, 睇下係咪真係咁好食! (咁啱得咁橋, 原來呢間野係我地去開修甲(Tnail) 樓上, 下次可以去呢到食完lunch先去修甲, 勁方便!)



好食既餐廳一定多人去, 為免無位所以一早都book.  果然, 不出我所料, 全院滿座, 我地被安排坐樓上.




呢張相係我地hea到先走時影既, 當然無晒人啦.. 但個經理好好, 俾我地周圍影下相!




去到第一個感覺, 間餐廳都幾骨子, 雖然地方唔大, 但仍然有情調, 有氣氛, 感覺好cozy, 適合情侶或幾個密友黎相聚傾計.  另外我就俾餐廳內既樓梯吸引住, 因為好少商業大廈既餐廳會有樓梯上第二層. 樓下感覺較開揚, 可以望出窗外, 但樓上亦都唔錯, 因為較少餐枱, 相對較靜, 好啱用黎作私人派對用途! 


我靈機一觸係到諗, 承熹一歲生日會可以諗諗係到攪, 因為承熹未有同學仔, 生日會所請既大部份都係大人, 以呢到既食物質素, 我相信包無失禮!





睇過餐牌後, 我覺得呢到既set lunch價錢都OK, 唔算貴, 由七十至一百不等


但當我食完後, 發覺以佢地既味道同質素, 收呢個價錢其實係超抵! 因為普普通通既Simplylife, Pokka閒閒地都差唔多一百蚊一個lunch, 但質素真係好一般, 比起快餐店好少少而已, 但呢間餐廳既食物你係食得出唔係求其做午市, 佢地真係有堅持佢地既quality! (可能因為啱啱開業掛~)


 


我地問經理有無咩無酒精既特飲介紹? 經理為我地order左兩杯..




我呢杯叫'Pink Sky', 係用紅梅, 藍梅&士多啤梨調製, 我覺得好好飲, 因為有少少生果既酸, 唔太甜, 又夠凍, 但又唔會好酸, 飲完好開胃




大少奶個杯係薄荷荔枝, 佢話佢鐘意薄荷味, 所以都好啱佢飲!


, 由於我地兩個三心兩意, 覺得好多野都想試, 所以我地最後選擇散叫.  我地揀左兩款頭盤:




呢款係海鮮薯仔沙律! 望落都覺得應該唔錯, 食落就真係超愛, 佢唔同一般沙律用Olive Oil去調個汁, 佢呢個汁係用意大利既XO, 味道比較偏向重蕃茄味, 呢種味好特別, 海鮮要新鮮係基本要求, 我同大少奶都覺得呢碟沙律有驚喜!




另一款係coldcut, 相比個沙律, 呢款就變得無咁出, 但都唔錯~


其實點解我地咁鐘意呢間餐廳, 可能因為食物質素好好已經係最大吸引之處, 另外就係呢到既Managernice, 佢好後生, 但就好識同客人互動, 佢介紹啲野食得黎又唔會好hardsell, 大家都知我同大少奶一走埋一齊就傻傻地, 問東問西攪攪陣, 但個manager都好好人, 無白鴿眼我地呢..hahahah



見到啲湯唔係好貴, 我地都order左龍蝦湯&黑松露湯各一



龍蝦湯係超正的. 因為我試過好多餐廳既龍蝦湯好多時都係死咸, 咸到飲唔落, 就連帆船酒店既龍蝦湯都一樣好唔掂 (可能正宗係咁, 我唔知, 我唔識欣嘗囉!) 但呢間既龍蝦湯真係有龍蝦味, 唔係一味死咸, 仲有好多龍蝦肉.. 好開心


另一款黑松露湯都好好味, 好似磨菇湯!




Main course我原本想食義粉, 但見到呢款乳鴿義大利飯覺得好特別, 都未聽過! 平時食開既risotto黎黎去去都係磨菇/海鮮/蕃茄意大利飯, 難得有新款式, 我就揀左呢款乳鴿版既risotto.  但大少奶第一個反應即時問侍應, 隻乳鴿可唔可唔連頭上???  個侍應就答: 你放心, 我地唔會連頭上, 因為已經拆晒骨架啦!  哈哈, 其他人唔會明白大少奶係有幾咁怕呢啲雞頭, 魚頭, 甚至乳鴿頭, 我都一時忘記左!!!



大少奶order既係羊架, 呢隻羊架一黎到睇賣相已經非常吸引, 因為好大份..hahahaa 佢係兩件骨為一件, 啱晒男仕既份量, 而且見到啲肉質仲有少少紅, 一定唔係overcook, 啱啱好!




我地兩個當然係share黎食, 鋪係件羊架上面既醬好特別, 有少少介茉又有少少好似芝士既味, 原來呢款醬係廚師係前酒店米芝連星級餐廳到學返黎既醬料, 配上羊架真係好一流, 而且羊肉好嫩口, 一啲酥味都無! (不過其實我自己鐘意有少少酥味既羊) 但都好正!




而乳鴿risotto相對又失色左少少, 不過都唔係差只係每次一有對比, 我同大少奶既口味都好相似, 所以大家焦點就放左係羊架到..哈哈!


一餐完美既西餐又點可以少得甜品呢part, 尤其我同大少奶都咁鐘意整甜品, 就算幾飽都要叫!  而且之前見到朋友post過佢係到食既甜品, 非常吸引, 有啲仲要係意大利空運過黎, 點都要一試!!!!





大少奶點的意大利原隻朱古力雪糕球同埋我點的意大利十二年陳醋伴士多啤梨




雪糕球係原隻意大利運黎, 之前係雜誌都見到介紹過, 一直想試, 今次終於完成心願...好開心!  味道好濃郁, 一食又係滿口高質素既朱古力味道, 最特別係佢朱古力心包含另一種味道, 初時以為係香蕉, 但原來係mascarpone cheese, 平時用呢款cheesetiramisu, 無諗過咁樣夾住食朱古力雪糕味道又幾夾!


呢款雪糕係意大利運黎都係賣六十八/七十八(我唔記得), 一啲都唔貴, 抵食過哈記!


而我叫個款士多啤梨仲驚喜, 我從未試過就咁用陳醋去配生果食, 而且醋本身酸, 士多啤梨又係有少少偏酸, 仲驚味道怪怪的.. 但經理話十二年陳醋係比起一般八既陳醋香好多, 係貴價貨, 值得一試!  咁我見佢之前介紹既都唔差, 再信多佢一次啦我都唔想食黎食去都係cheese cake/tiramisu.. 好彩都無令我地失望, 呢隻陳醋唔會好酸, 相反好香醋味, 伴落士多啤梨一齊食又真係好特別, 個種味道我唔識形容, 但真係一個好好既配搭!


唔知係咪經理見我地咁大食, 又食得咁開心, 佢興之所致送多一款又係由意大利空運黎既'檸檬撻'俾我地試下, 我本身對檸檬撻一般, 覺得佢好甜同好酸, 但心諗, 唔洗錢當然乜都試下啦..hahahaha




但結果又係一試便愛上(撞鬼, 我呢排啱啱開始減肥先瘦左少少, 今餐乜都返晒黎)!!! 佢個撻好黑人憎, 入面有好多nuts, 但啲nuts好香, 混係檸檬撻到搶左好多味, 檸檬撻相對就無咁酸, 我勁鐘意, 比起個士多啤梨, 我更愛! 救命~


食埋咁多意大利空運既甜品, 有一刻, 我幻想自己真係置身係意大利咁..wahahha..


呢餐真係非常非常豐富, 雖然份量食得有點兒過份, lunch time dinner既野, 但真係食到好滿足, 開始有啲討厭太古城既餐廳如果佢係太古城開一間就好啦!


不過經理話佢地既menu耐唔耐會轉一次, 會根據返個段時候咩新鮮就轉當造既菜式, 所以就算我今次覺得好食既野, 下次都未必有.. 但唔緊要啦, 最緊要係希望佢地可以一直keep住呢個水準同價錢, 我唔想將來佢地出左名後就會降grade, 因為要搵到一間可以keep住有好水準既餐廳真係唔易啊!!!


好耐無好詳細咁寫飲食遊記, 感覺自己好似返返去做女個時..哈哈哈哈哈!!!!




飲埋杯Ginger Latte, Perfect!


又要返屋企做湊仔婆但我要做一個識飲識食有品味既湊仔婆....Wahahahahaha


9 則留言:

  1. 妹妹 你明明自己一個都係傻傻地架 呢餐超驚喜,驚到我夜晚都無食晚餐啊 哈!我一聽乳鴿就叫人走頭,但人地西餐點會上埋個頭呢?哈哈哈 愛你家姐上

    回覆刪除
  2. 我見到都好想食,你咁詳細寫,一定係比文字描述的更好食。我又係得個睇字。流晒口水呀!!!

    回覆刪除
  3. 好想食呀!!! weekend有無set lunch?

    回覆刪除
  4. 祝你中秋節快樂、減肥成功, 承熹聽教聽話, 大少新工工作順利 !!

    回覆刪除
  5. 愛吃愛旅遊的陳小姐2010年9月22日 中午12:15

    見你去食完第二日就寫左篇BLOG, 我開始慚愧自己食左第三次, 都只係寫左第一餐... ! 我要發奮D先得... 呵呵~

    回覆刪除
  6. wowow....價錢真係一d 都唔貴喎....而且d 食物既放法好有高級resturant 的水準啊

    回覆刪除
  7. 真係好吸引呀, 多謝介紹, 搵次要約朋友去試下先!!

    回覆刪除
  8. 之前在杜拜生活便一直看你的blog, 今年三月囘香港后就要求你把我加入你的 blog 友,讓我可以繼續分享你的點滴。看到這篇文章才知道你也住在太古城,真是太巧了
    很不錯的餐廳,是個與另一半去的好地方,thanks for sharing!
    All the best & 中秋節快樂!!!

    回覆刪除
  9. 好吸引ar~~~ 想問一下~ 你呢餐價錢大約幾多ar?

    回覆刪除