2009年10月12日 星期一

婚前回憶...

講返結婚前一晚少少花絮


酒店package附送結婚當晚住宿俾我地, 但我地改為婚期前一晚享用, 咁第二日就唔洗咁趕


不過我地因為太多野未準備好, 婚前一日仍忙於籌備, 入利是、安排坐位、通知親友、攞衫、攞花球等... 攪到成十一點先check-in... (好嘥啊~~)


係香港好少入住酒店, 仲要係位置咁正既洲際酒店,, 個無敵維港景真係好靚... 可惜當日天氣唔好, 不停落微雨, 所以個景都遜色左少少...



濛鬆郁既夜景....



Package包既房, 當然都會以Wedding黎做主題, 房入面都準備左一d 小禮物.






呢pair 新郎新娘曲奇餅好靚, 依家仲放係我屋企個櫃裡面, 唔知幾時會發毛?!



房間唔算大, 但比我像想寬敞, 始終係送既,, 仲以為會係好細好迫....



反而個洗手間有驚喜, 好夠大, 第二日我同媽咪/奶奶佢地都係係呢到化粧set頭..



呢晚房間仲有包一餐late supper & 香薰浸浴..


雖然check-in前已經填飽左個肚, 但有得送, 當然唔蝕俾佢啦.. (加上大少話 : 車, 你估真係好多野食咩, 最多咪三文治個d!)


點知送到黎時, 竟然係咁豐富.......



最興奮係有成排甜品... 真係諗都諗唔到... 哈哈哈!



最值得表揚既係, 佢地既食物一d都唔求其,, 每一樣都做到好好味..... 尤其個瑤柱鮑魚粥 --- 超綿呢!!!!


點心同埋大蝦干燒麵都係無得頂!! 唯一美中不足係我地之前已經食飽左, 飽住黎食真係有d唔夠過癮.... 


雖然飽, 我當然都唔會放棄每一款既甜品,, 除左楊枝金露有芒果我無食外, 其餘我全部都食左半杯.. 連大少都話佢既紅荳沙一d都唔馬虎, 煮得好沙, 好好味!!!!!


我相信除左我, 無乜準新娘可以係結婚前一晚仲食得咁狼死... 哈哈~



090929除左係我地既大日子, 亦係小魔怪五個月大既大日子... 依家成鬼日踢我, 好百厭!!



大拆一餐後, 再call 人上黎幫我地準備個香薰浴.... 初初又係以為就咁放水加幾滴香薰油 (大少仲話放水浸自己攪都得, 唔洗又call人... 但我當然堅持啦, 有人serve仲乜唔搵人攪喎!), 估唔到點晒candle, 放晒花咁認真!!!


沖完涼浸一陣浴就即時把握時間訓覺,, 因為第二日化粧師七點半會到, 我地要趕住係佢黎前落樓下食B/F buffet (酒店包), 如果唔係就得room service 既早餐, 無咁多野食麻!! 依家既我, 多多都食得落...hhehee



呢張相應該係清晨五六點大少起身影...


我同大少講, 以後每年結婚週年我都要BOOK返呢間酒店住, 仲要同一間房, 回味返今日既事, 慶祝一番!!  (佢當然無理我啦....哈哈哈~)


點都好, 好多謝老公安排左一個咁難忘既婚禮俾我...  我好滿意, 好開心呢!


I love you forever~


2009年10月10日 星期六

290909 大日子

好多謝大家既祝賀...


咁遲先update真係唔好意思!!!!  


忙完結婚搬屋, 我倆休息幾日, 大少尋晚又要返中東, 繼續努力工作


雖然十萬個唔捨得佢走,, 但為左將來, 為左小魔怪... 再唔捨得我都要堅強,


等待多兩三個月就可以一家團聚啦!!!!!!


Post返當日少少相片同大家分享...  真係好多謝大家既祝福~


 






P.S.艾美為我做既靚靚回禮禮物... 多謝你啊!!!!!









多謝各位!!!! hehehehehhehehehheheheeeeeee


 


**嗚謝攝影師Cody & 化粧師Mango既幫忙... thank you!**