2008年8月31日 星期日

Papa John's Pizza@Abu Dhabi

星期五放假同大少出外走走, 買下餸又過一日


係香港返黎後, 對呢到所有野都不感興趣, 係呢到住無論行街/買衫/食飯都唔夠香港吸引, 純綷只為行下而行街, 感覺係悶D, 但做人偶然俾個腦休息下, 好奢侈咁浪費時間, 優閒地過下日子, 都唔錯啊!!



呢邊間新Mall (Khalidiya Mall)開左Papa John's Pizza, 以前同大少出杜拜佢必定要食呢間既芝士批, 但依家Abu Dhabi都開左間, 以後想幾時食都得啦!


聽大少講, 以前佢同兩個同事初黎步到, 發現呢間pizza係佢地食過咁多間最好食.. 而且價錢合理, 好受歡迎!



選擇都有好多款


個日下午三點先去食, 唔想食得太飽, 只係叫左一個一人餐加多碟義粉



呢款係Shrimp, Mushroom, Tomato Pizza,  雖然見唔到大大蝦, 但食落卻好重蝦味, 不錯吃!



最正係佢地既芝士真係好多!!! 唔係廣告至有呢種效果, 堂食都有架~



另外最得大少歡心既就係呢款芝士批, 其實我唔sure係咪咁叫, 但一般佢地只當係小食, 個料乜都無, 只得濃濃芝士, 配上佢地既秘制醬汁..  第一次係杜拜食都已經覺得唔錯, 唯一弊處就係一邊食, 一邊好有罪惡感!!!!



薄薄一塊, 但如果一個人食晒成份, 飽死!!! 但我地呢個只係細size, 大size個款大呢個一倍到!



最後仲有義粉, 我唔記得咩意料..  少辣, 好好味!


呢個一人餐(包汽水) + 一碟義粉都係港紙八十大元!!! 我覺得係到食呢d仲平過係香港, 平時係香港兩個人去義粉屋食個下午茶餐都要百幾蚊.. 而且仲唔係好好食, 返完香港返黎, 覺得呢到D野又唔係真係咁貴!


2008年8月29日 星期五

度小月肉燥之謎!

休息左四個月, 尋晚第一晚正式落廚, 豐富既餸菜欠奉, 但開左一罐大少一定鐘意既魯肉(肉燥)黎試下!



呢罐魯肉係六月去台灣度小月到買, 特登就係買俾大少食, 佢好鐘意食魯肉飯, 今晚就靠晒佢黎做主菜! (因為我仲未warm up 完, 個腦仍然處於閉塞狀態唔知煮乜好!)


老實講, 未開之前對佢期望幾大, 話晒咁出名..  但開左之後, 發現超級油膩, 直程有一舊肥膏係面(size約小型雞蛋), 嚇到我拔起舊肥膏係到諗左一分鐘, 點解會有咁大舊肥膏?? 係咪壞左變色, 係肥膏定係魯肉??呢舊究竟係乜黎架???  最後都係掉左


食法係一份肉, 三份水, 然後攞去蒸熱佢.


 
 


蒸完出黎, 我無眼睇, 油到嚇死人!! 好在我係香港買左一包吸油紙(吉之島/十蚊店有售), 用左三張放上面吸, 就吸晒D油, 如果唔係, 我一定唔會食落肚!!!!


吸完正常好多, 唔算好油.. 但因為本身好咸好咸, 我加多過三份水, 變得好稀(但仍然偏咸), 無乜肉碎!  其實講咁多, 都係想同大家講, 千祈唔好幫襯佢地罐頭既魯肉, 寧願堂食食多幾碗~



幾經波折既魯肉飯, 自己整無咁嬲!



蕃茄炒蛋, 超級簡單既菜式, 但大少話簡單得黎係最好味... 佢仲話, 食完呢味餸已經知道我煮飯有進步! (下, 我成四個月無煮喎,, 會唔會係你太耐無食過咋?!)



蒜片炒青瓜,, 好掛住香港既豆苗同皇帝菜, 點解呢到無呢D菜賣啊??!



尋日介紹既冷麵, 我係買呢隻牌子, 吉之島有售!


2008年8月28日 星期四

新鮮滾熱辣

新鮮滾熱辣,, 啱啱一個鐘意前同大少共享既午餐


尋日執廚房時掉左好多過左期既食物, 一邊掉, 一邊鬧自己仲乜鬼買咁多, 依家食唔切又過左期, 好嘥啊!!!!!


最慘係我唔記得自己買左咁多, 今轉係香港又買買買,, 舊既未清, 新既又係到.. 真係撞鬼,, 所以依家我要密密煮, 密密食!!


上次買既芝麻醬九月到期, 未開封, 我今次係香港又買左兩枝過黎.. 唉! 今日唯有食冷麵用左舊個枝先~



上次食過阿茄煮既冷麵, 覺得呢隻麵質好得啊! 唔太幼, 夠彈牙, 買左包返黎, 大少都話好好味!!! 


我今次返黎仲預備左d保溫袋同冰袋, 雪住d 急凍蠔, 帶子, 貢丸, 花枝丸, 黑椒丸等返黎, 有排食囉~



三文魚尋日新鮮買既, 自己用鹽&香草醃半小時, 大火兩面煎後放入焗爐焗10-15mins即可,, 個皮仲好脆添!



大少一返黎已經講 : 嘩,, 好耐無呢d咁正既野食,, 好開心啊!!!!  好好味, 好好味,, 死囉, 我實肥返十磅啊! (哈,, 佢同我講佢自己瘦左十磅, 我心諗, 唔洗一個月, 你實反彈唔止十磅!)



仲有一碗熱辣辣麵豉湯, 問你死未?!


2008年8月27日 星期三

熱鍋上的我

Day 1 @ Abu Dhabi, Moody


我已經返左杜拜啦!


首先要同原本口頭約左我, 但又未能見面既朋友講聲唔好意思.. 下次返黎再約過下!!  Sorry~


告別杜拜四個月, 一落機已經周身唔自然, 今次係我離開得最耐既時間, 返到黎真係唔慣.. 就講天氣, 都已經令人有窒息既感覺!!


夜晚十點半到屋企(即香港半夜兩點半), 返到黎有少少陌生, 感覺好冷清, 而且呢幾個月都係由鐘點阿姐執屋, 我感覺上樣樣都唔乾淨, 唔係太習慣呢! 不過唯一無變既係, 張床依然係我訓過咁多張, 最舒服既一張~


今朝起身仲未回魂,, 下晝同大少出去食Wasabi, 話晒第一餐, 唔想同香港有太大差別, 食餐好既先!!!!!!



小食 : 雞肉球



我同大少一人一份定食


 


呢間日本餐廳係呢到算係唔錯既日本料理, 食物新鮮, 而且價錢同香港差唔多(set lunch only), 好受歡迎架!


 
 



我既刺身定食



大少既燒三文魚定食


天氣真係熱到痴線,, 我想像唔到如果一世都要住係我, 做人會有D乜野樂趣???


今晚等大少放工, 有特備節目 : 去supermarket 買餸~


2008年8月21日 星期四

神啊, 請眷顧我們吧!

今年好似特別多颱風, 仲要次次都打得成, 真係唔知係好事定壞事?!


感謝主令大少平安到步, 避過風雨, 安全降落.


22 Aug 08 星期五係一個重要日子, 求主再一次彰顯恩典, 減低鸚鵡既威力令到我地可以順利出席Cindy既追思會, 以表示我地對佢最後一點心意!


欣賞天皇堅決八號風球仍然會繼續追思會, 真係希望鸚鵡手下留情, 唔好夜晚至吹到正!!!


麻煩各位主內弟兄姊妹一齊祈禱, 求一切順利平安!


感激!!


提外話 :


雖然Cindy已經唔係世上, 但我覺得Cindy有天皇(天皇最新網誌) 呢個老公真係死而無憾! 一個大男人, 可以將自己心底話講出黎, 實在唔係容易既事!! 天皇對Cindy 既愛, 令我深深體會到如果失去至親至愛既人既感覺, 真係會好傷心, 傷心既程度並非可以用幾句字眼就可以形容出黎..... 理性上知道要接受, 但心理上卻永遠都唔想接受! 好心痛, 好難過


又係個句, 請唔好嫌棄你家人/情人/朋友對你既喋喋不休, 一個關心你既人先會緊張你既所有所有!


Daddy, 我成日話你煩,, 對唔住!


2008年8月20日 星期三

聚舊@天后

尋日同朋友A去天后晚餐, 我特別揀左呢間位於天后清風街(橋底) 較隱蔽既餐廳.  呢間餐廳係四五年前俾我發現, 其間耐唔耐都有黎食, 最鐘意既係夠靜, 少人, 但食物質素又唔差, 啱晒同朋友/男朋友黎撐枱腳, 傾心事啊!





而且我都幾鐘意佢歐陸風味裝修, 好舒服!



呢間餐廳主要係食西餐, 但我諗佢無分邊個國家, 每次黎都有唔同




尋日係粟米忌廉湯, 我記得之前有試過係南瓜湯/蘿宋湯



一直令我念念不忘既係佢地既大蝦Risotto, 好Creamy, 又夠熱, 好好味, 今次係南瓜意大利飯, 但我都係比較鐘意以前既蕃茄味!



朋友A 知我又想食牛排, 佢話佢自己好NICE喎, 所以就我點牛排, 等我可以兩樣都有得食.. 哈!!!!  A級肉眼扒, 瘦骨如柴既朋友竟然慢慢食, 慢慢食都差不多食得晒! (好羨慕佢食極唔肥~)


最後, 我地仲有另加甜品,, 太誇張!



朋友A既朱古力雪糕拌蘋果酥



我既法式Cream Brulee, 好滑,, 食完好滿足呢!


Set Dinner 仲有包咖啡/茶, 大約每位$200.


奧運期間真係十萬個唔願意出街, 尤其尋晚又有跳水決賽, 又有女子平衡木決賽, 仲有溏心風暴啊!!!  所以我好狠心咁叫左住係九龍既朋友A過黎天后用餐, 方便我可以十點前返屋企, 哈!! 真係唔好意思, 下次就返你去九龍啦~ heeee


聽日大少返到HK, 但又會咁啱今日又掛一號風球!  希望大少一切平安, 順利到港, 求主保守!!


餐廳名 : Cafe Eos


2008年8月19日 星期二

平時唔好太用力!


朋友send呢段片俾我... 同大家分享下


以前成日聽日講, 大肚婆生BB有時用力得濟會連'唔唔'都疴埋出黎, 聽完覺得好不可思議, 係咪真係咁誇張?


但睇完呢段片, 我信啦!


To家姐:


你唔好再學佢地啦, 我唔想你有失儀態啊!


heee..


 


2008年8月17日 星期日

飛E生日會@私竇

又係增肥既一日啊!!!!


今次主角係飛E,, 預祝飛E生日快樂, 事事順利, 心想事成, 身體健康最緊要!


每次去阿蓮到Gathering, 我之前一定唔食野, 留返個肚食好野! 今次主題係海鮮, 實在開正我個範,, 飽到上心口實在在所難免呢!


 



每次阿蓮都會為我地預備花茶,, 好好飲!



菇菇姐做既焗蠔 & 松子南瓜魚,,, 好好味, 我最愛既焗蠔啊!!!



如果呢個南瓜魚係有飯拌黎食, 我諗我可以食到兩碗飯!



難得阿茄落廚, 蟹子彈彈Q烏冬, 配丘比特芝麻汁超讚!



鄉下人整既海鮮酥皮撻又係好好味啊!!!!  我食左兩個!



飛E既海鮮沙律,, 個醬汁簡直係靈魂,, 食完特別醒胃,, 我唔知食左幾多轉?!



B媽今次早走, 都未黎得切讚佢既生菜包&豉油雞翼!



呢包光酥餅唔知係咪真係B媽買呢??



Vanlily做既Cheese Cake & 香蕉朱古力撻, 香蕉朱古力撻第一次食, 超好味,, 我帶左件返屋企俾Daddy食, 佢都話正啊!


以下就係外賣既食物, 失禮失禮~



又係我負責買既壽司!!



Tan Tan 打去交友熱線訂既 : 知心朋友批



阿G買既煎讓三寶



激辣魚蛋,, 好好味!



仲有特別為我order既墨魚丸, 魷魚!


minicorgie 買既串燒



仲有...呢個唔知叫乜? 後面係白雲鳯爪!


我就咁由頭介紹都覺得好誇張, 我地成班女人竟然食咁多野,, 好痴線啊!!!!



我地今次仲玩集體遊戲Pictioinary, 估領袖 同埋做動作估生字,, 超好笑!!!



阿蓮呢到真係好正, 好多遊戲設備,, 有好多我都無玩過呢!


<--官方照片


最後當然唔少得家姐大少奶為飛E做既Truffle Cake , 內有咖啡海綿蛋糕, 外層朱古力mousse超超超滑, 大家都食到lam lam 脷啊!!!


尋晚又玩到七點幾先散Band,, 返到屋企都食唔落飯啊!


朋友們, 下次你地既聚會我唔知有冇機會出席到,, 但呢幾個月我係香港, 真係好多謝你地成日都倍我玩呢~