2007年7月31日 星期二

簡單....不簡單?!

呢幾日我要盡快將雪櫃既餸菜清晒佢...

由於我啱啱前兩日先入貨, 所以我要動動腦筋, 睇下點煮先可以係星期四蒯食晒~

自創以下食物, 我點名為 : 雙椒鑲魚腐

我將龍脷柳用搅拌機攪溶, 加入調味, 加入豆腐再攪勻... 鑲入紅/黃椒內, 大火蒸20分鐘即可!

靜靜雞話你地知..... 呢個餸... 唔好味架!!
haaaaaaaaaaaaaa  因為我無將魚肉打至起膠, 食落好似蒸水蛋咁林~~~

又係炒飯,, 原因係想煮埋D魷魚 & 食埋D煙三文魚!! 好好味~~

呢罐係冬陰功湯, 買左好耐都味飲, 今日想煮埋D蝦,, 唯有開左佢加幾隻下落去啦~~ (我對呢罐罐頭湯無乜好感, 心諗一定唔方好味, 但大少堅持要試!!!)

碗湯得一人份量,, 我先煎香D蝦先放落去滾一會... 即可!!

原來個湯既味道幾好喎, 同正宗冬陰功有九成相似... 大少即刻問我呢罐can係邊到買... (都買左成4 個月,, 鬼記得咩!)


最後就係椒粒腐乳炒生菜...
太好啦, 仲有個冬瓜&大白菜,, 希望聽日可以K.O. 埋佢地啦!!!

看似簡單既午飯, 其實都好唔簡單....  (用左好多材料!)


2007年7月30日 星期一

終於成功左!!!! yeah~~

28 July 2007 - 菠蘿包、腸仔包 & 餐蛋包

成功啦,, 成功啦!! 今次終於成功啦~~~ (感謝主!)

整包包一直係我逃避唔做既食品! 原因係之前試過兩三次都做得唔係太成功 (有兩次可以係話徹底失敗!!) .
...  次次都有問題出現..我估
一係個麵粉有問題, 一係步驟有問題,, 一係發烤有問題,, 一係就有問題!!!

就係咁, 我一路都唔敢再做....

上星期六, 大少心血來潮話想食包... 叫我試整多一次!  係唔太願意之下, 我都係做左~~

但今次出奇地成功, 好開心呀... 我終於夠擔寫出黎教人啦~~ (草菇老抽, 呢個recipe欠左你好耐好耐... 唔好意思

!)

甜麵包材料 :

高根粉 ..... 201g ; 糖 ...... 26g ; 凍水 .... 80g ; Salt ..... 少許 ; 牛油(溫室) ... 26克(切小粒);

加強劑 .... 3克 ; 依士 .... 5克 ; 雞蛋 ..... 27克 ; 牛奶 .... 26克 ; 雲尼拿香油 ... 半茶匙

做法 :

1) 依士加少量水浸2-3分鐘 (攪勻, 水既份量約遮蓋晒D依士)

2) 所有材料放入盤內 ( 除牛油 & Salt ) 用機略打勻 (機頭用上圖個隻), 略攪後加入牛油& Salt

3) 用機攪勻後, 取出, 用手繼續搓至拉開麵粉唔易拉開&唔黏手; 將麵團放入較高身盆中, 用保鮮紙輕輕蓋面

4) 以250度預熱焗爐一分鐘即turn off... 將麵團放入焗爐發烤半小時!

5) 麵團發烤後將比起原有size大一至兩倍 (如圖二), 手指沾上高粉, 篤入發烤麵團一下, 無反彈即OK;  然後將麵團拉長型, 用棍揼出空氣 (如圖三)

6) 再將麵團平均分割一舊舊 (每個約40克) , 放在盤上用保鮮紙輕輕蓋住 (如上圖四) , 待10分鐘; 然後可以做型, 即卷入腸仔, 放入餐蛋料 或就咁搓圓一個麵團加塊菠蘿皮(如上圖5-7)

7) 接著, 再次發烤, 做法與 step 4一樣

8) 最後, 取出麵團後用掃輕輕塗上薄薄蛋漿 (要輕力, 唔好大動作再move舊麵團) , 同時預熱焗爐180度

9) 視乎火力, 180度焗15分鐘, 即可!

Remarks : 如果份量太多, 唔想一次焗晒, 係step 6 做完後可用保鮮紙包好放入雪櫃, 第二日攞返出黎重覆step 4, 然後攞去焗, 就可以食到味美麵包啦!!!

 

菠蘿皮材料 :

高根粉 ..... 75g ; 牛油 ....  38g ; 糖 .... 57g ; 蛋 .... 7 g ; 臭粉 .... 1g ; 梳打粉 ..... 1g ; 水 .... 7g

1) 將所有材料(除水外)放入盆內攪勻, 最後加入水攪 (如用機打得唔勻, 可落手搓勻)

2) 將麵團搓薄薄一片(約2-3mm), 在甜麵包做型時可撻一塊上去, 即可!

Remarks : 嗅粉真係好嗅架, 所以唔好落多過1g呀!!!

噔噔噔噔... 我兩個傻人對今次做包過程抱好大希望, 直程搬埋張櫈入廚房睇住個焗爐, 怕會焗燶!

效果真係唔錯呢... 係個一刻, 仲影緊相, 唔知味道如何...(心諗唔食得都睇得喎!!)

做到一隻靚包包,, 我個心情比起做蛋糕更興奮!!

食啦食啦,, 大少先咬一口, 無出聲遞過黎俾我試.... 一咬落去!! 嘩~~~~~ 勁好味呀!!! 新鮮熱辣已經係好GOOD,, 仲要真係十分鬆軟... 完完全全係好成功!!!! 我地一路食一路係咁搖頭驚嘆.
... 真係估唔到我都做到!!! 

呢個係獨家製做,, 餐蛋菠蘿包.... 睇下D蛋.. 一層層幾靚, 係大少煎架!!!

今個月做左咁多蛋糕小點... 呢個真係我自己最有成功感既作品~~~ 新鮮出爐既麵包... 真係好正呀!! (菇菇姐, 唔怪之得你成日都會整包包啦!!)

咁好味既野, 我地食完即刻揸車外賣送去俾其他同事食.. 個個都話一流泥~~ (因為大家實在太掛住港式麵包啦!!)


特登做多D份量, 就係為著第二日都有新鮮熱辣包包做早餐!! 大少食得好滿足呢~~

自此, 我下次返香港會買多D關於整包包既書, 再作深入研究先!!! heeeeeeeeeeeeee 加油!!


著草往巴黎

好開心呀!! 終於confirm晒, 可以去巴黎啦~~

一直都唔敢提及自己會去旅行, 原因係大少一路都未confirm工作量容唔容許自己行開幾日!

而且睇得我個blog 耐既bloggers都知我每次去旅行都係著草Feel...禮拜頭plan去, 禮拜尾即飛!!  所以我永遠唔可以好似人地咁慢慢plan行程 or 享用平價機票&酒店~

到左前幾日大少自己一個去問機位, 航空公司話去巴黎既機好FULL.... 而且機票要成萬幾蚊(港紙)一張 (因為依家係peak season) !!!  一路認為去唔成既我, 都唔無抱太大期望~~ (係人都知出發前幾日好難會有位架啦!
  一早叫你去問又唔去!)

點知, 尋日我地再去航空公司holiday package個面問...個Sale 話我地好Lucky!! 竟然有位喎~~~ yeah!!!
(其實之前我個心祈禱時已經同神講, 將呢件事交俾佢, 有得去就去, 無得去就算... heeeeeeeeee  感謝主既安排!!)

到呢一刻我都好似發緊夢咁, 仲未有去旅行既興奮!! 只係望住個雪櫃, 見到啱啱入左一批食物, 諗緊點樣可以係短短三日內清晒佢??  一堆未熨既衫, 陣間要啦啦聲熨埋以防去旅行要著...

我仲要係呢幾日極速問下Paris 既blog友 & 刨下我本西歐遊, 究竟要去邊到玩.... 話雖以前去過一次, 但畢竟已係十多年前既事!! 當年年少無知, 唔識珍惜歐遊既時候

,, 今次再去, 我唔會再好似以前咁笨,
乜都無買就走... 哼!! heeeeeeeeeeeee


2007年7月29日 星期日

香宮 (Shangri-la Hotel) @ Dubai

上兩星期一早約好晒d 同事一齊出杜拜飲茶!


點解要特登揸個幾鐘車出杜拜飲茶呢??? 如果一直有睇我個blog既blog友, 應該記得曾幾何時我係阿布達比一間名謂北京樓中國餐館飲過一次茶!! 個次恐怖經歷, 令到我以後都唔敢再奢望係呢到會有好味既點心食... (想知之前有我有過乜野恐怖經驗, 可以click呢到睇返!!)


不過好耐之前見到尤妮斯介紹過杜拜Shangri-la Hotel入面有間好出名既中國餐廳 -- 香宮! 係呢到, 只需付Dhs 99 (約二百港元) 可以任食點心, 而且點心質數尚算可以...


就係咁, 我地一行六人不妨又試下啦!! (橫樹都做左咁多次老襯, 都唔差埋今次啦...

)



落車時, 就係斜對面見到呢座Burj Dubai, 比起之前又高左一截,, 唔知年底係咪真係可以起貨呢? (有興趣知呢座將會係全世界最高既建築物, 可以Click呢到重溫!!) 



唔好諗住Shangri-la好high...呢到d 酒店design真係麻麻(除左超貴個幾間!!) ,,, 泰國個d靚過佢!



係咪好似好豐呢!!!  話就話係任食, 其實全部食物款式已烴係晒到架啦,, 不過可以不斷寫紙refill!!  但係大家有冇留意,, 係無鳯爪, 無排骨, 無咸水角等.. 飲完茶都唔覺自己啱啱去完茶樓! (個口無d油膩既感覺呢~~) 不過我地都係咁重覆互相安慰 : 唔可以咁高要求, 呢到已經好好架啦....




睇下,, 起碼蝦姣皮既厚度似返舊蝦姣皮,, 唔會好似北京樓咁好似食緊紙皮~





食完一餐心靈上滿足既中餐.. 過左唔夠兩個鐘, 大少同d同事已經嗌肚餓, 話頭先好似無乜食過野喎!! (唉, 我頭先一早已經叫佢地食多d啦, 成200蚊位, 雖然d食物食黎食去都係個d... 但都唔好"sit"俾佢地麻!!! )